Este sábado 10 de maio vai ter lugar o acto de entrega da vixésimo primeira edición do Premio Xornalistas de Liberdade de Prensa, convocado polo Colexio Profesional de Xornalistas de Galicia coa colaboración da Deputación da Coruña, a través da área de Dereitos Civís, como distinción da profesión galega a aquelas persoas ou organizacións que destaquen pola defensa da liberdade de prensa. O galardón recaeu nesta ocasión no Sindicato de Xornalistas Palestinos (PJS, polas súas siglas en inglés), a organización profesional non gobernamental que representa a totalidade dos xornalistas palestinos, como recoñecemento da situación dramática que están a vivir as e os informadores palestinos. 

 

O acto de entrega estará presentado pola xornalista Ainhoa Apestegui e vai dar comezo a partir das 12:30 horas coa lectura do manifesto do Colexio Profesional de Xornalistas de Galicia con motivo do Día Internacional da Liberdade de Prensa, a cargo do seu autor, Anxo Quintela. A continuación, Valeria Pereiras vai realizar unha entrevista a Nasser Abu Baker, presidente do SPJ, sobre as condicións que sofren as e os xornalistas en Palestina e o traballo que está a realizar o sindicato en favor da liberdade de prensa. Finalmente, Abu Baker recollerá o XXI Premio Xornalistas, consistente nunha imaxe dun ou dunha fotoxornalista galega, que nesta edición é da autoría de Óscar Corral, recente Premio Ortega y Gasset á mellor fotografía. Ademais, o acto vai contar coa actuación musical de Najla Shami, cantora e compositora galega de orixe palestina. 

 

A asistencia aos actos é completamente gratuíta e aberta ao público xeral até completar a capacidade do auditorio. Con todo, de cara á organización do acto, agradécese comunicar a asistencia no teléfono 981 93 56 70 ou no correo electrónico xornalistas@xornalistas.gal antes das 14.00 horas deste venres 9 de maio.

 

CPXG